सबले बढ़िया नगरिहा भैया
धरती मैय्या के सेवा बजाय
बासी चटनी पेज ला खाके
सुग्घर अपन जिंनगी पहाय
सबले बढ़िया नगरिहा भैय्या....
सुख-दुख के बेरा मा आके
सब झन सन मिलके गोठियाय
रहिथे वो रयपुरा गांव में
सरस्वती के गुण ला गाय
सबले बढ़िया नगरिहा भैय्या...
दीया सही अंजोरिया करथे
सुमता के रद्दा हे बताय
मधुर सहित के अगवा बनके
फुल बगिया कस हे सिर जाय
सबले बढ़िया नगरिहा भैया...
छत्तीसगढ़ के नगरिहा बेटा
करनी कहिनी कही न जाय
तोर दया ले तोर मया ले
अड़हा लइका गंगा नहाय
सबले बढ़िया नगरिहा भैय्या...
जन्मदिवस हे आज तोरे
जन जन मिलके खुशी मनाय
दे संदेश भाईचारा के
गोंदा फुल कस ममहाय
सबले बढ़िया नगरिहा भैय्या...
जिंदगी तोर सलामत राहय
तोषन धनगंइहा गोहराय
बनके सूरुज तै नील गगन में
रहिबे नवा अंजोर बगराय
सबले बढ़िया नगरिहा भैय्या....
तोषन कुमार चुरेन्द्र धनगंइहा
डौंडीलोहारा बालोद छत्तीसगढ़
कोई टिप्पणी नहीं:
एक टिप्पणी भेजें