मोर छत्तीसगढ़ महतारी

मोर छत्तीसगढ़ महतारी
●
जग के मइनखे तोला सुम्हरे हावस सबके दुलारी
मांथ नवावंव तोर चरन मोर छत्तीसगढ़ महतारी
●
कभू कहाए दक्षिण कौशल कभू धान के कटोरा
अरपा पइरी महानदी शिवनाथ बोहिथे तोर कोरा
गोड़ तोर धोथे हसदो इंदरा हांथ जोंड आरी पारी
मांथ नवावंव तोर चरन मोर छत्तीसगढ़ महतारी
●
हरिहर रंग के लुगरा पोलखा हरिहर साजे सिंगार
मान बढ़ावय तोर अछरा के हरिहर डोंगरी पहार
सोनहा सोहे नांक नंथनी कान सोहे सोनहा बारी
मांथ नवावंव तोर चरन मोर छत्तीसगढ़ महतारी
●
कोठी डोली तोर छलछल छलके भरे हवे भंडार
नंदिया पहाड़ी जंगलझाडी लहरावय खेती खार
सेवा बजावंव गुन ला गावंव हो जावंव बलिहारी
मांथ नवावंव तोर चरन मोर छत्तीसगढ़ महतारी
●
तोर चरन मोर तिरथ बरत सरधा भरे देवालय
अरन बरन के देंवता धामी दया मया के आलय
सबके तही आस पुरइय्या सबके हावस हितकारी
मांथ नवावंव तोर चरन मोर छत्तीसगढ़ महतारी
●
छत्तीसगढ़ही गुरतुर बोली जेहा सबके मन भाथे
राऊत नांचा करमा पंथी सुआ ददरिया गाथे
रंग बिरंग जिंहा फूल खिले हरे अइसन फूलवारी
मांथ नवावंव तोर चरन मोर छत्तीसगढ़ महतारी
●
नांगर बइला कमरा खुम्हरी धर तोरे सेवा बजावय
बड सिधवा हम तोरेच लइका सेवा म जिनगी पहावय
हावन सब्बर समरस धरमी सतसेवा संसकारी
मांथ नवावंव तोर चरन मोर छत्तीसगढ़ महतारी
©®
आचार्य तोषण
धनगांव डौंडीलोहारा छत्तीसगढ़ ४९१७७१