हजार पांच सो के नोट

हजार पांच सो के नोट धरे
खडे रहेव जी बीच बजार
आके कहिथे एक झन टुरा
देबे का चिल्हर हजार

में केहेंव रे बाबू सून
रहितिस मोर कर कोई चिल्हर
माछी बिदारत नंइ बइठे रहितेंव
ठेला म ओध के पिल्हर

टुरा सियाना मोला कहिथे
चिल्हर दे देंहूँ तोला
एक हजार म दू सो बटटा
काट के दे बे तै मोला

कांट के बट्टा आठ सो मिल जाही
लैन लगे नंइ परही
कोन सो मार मोर पइसा हे
पाए रेहेंव जी कल ही

धरीस हजार के नोट ल टुरा
पल्ला छाड़ भगाईस
चुरमुरा रहिगेंव मेहा संगी
आठ सो घलक नंइ आईस

मोर संन होईस जइसन तइसन
तुम झन करहू जी दाऊ
अपन पइसा भंजाए बर सोझे
अपन बैंक के रद्दा जाहू
©®
आचार्य तोषण
धनगांव डौंडीलोहारा