मानवता

***** ॥मानवता॥ *****
काहत हे समय आज के
झन रो सबला हंसाबे तै
मानवता हे धरम करम तोर
 मानवता के गीत गाबे तै
फइले दुनिया म नफरत
नदी प्रेम के बोहाब तै
***************
दीन दुखिया के सेवा में
अपन करतब नाभाबे तै
दीन दुखिया मनखे के
 जतन करे लाभ उठाबे तै
 खंचवा पाट भेदभाव के
सबला गला लगाबे तै
 पाप कपट ले मुंह ल फेरे
 पुण्य के लाभ उठाबै तै
 ****************
हम सब भाई भाई सफ्फे
 झन कोई ल ठुकराबे तै
बगिया सबे महके सबरदिन
बन प्यार फूल मुसकाबे तै
 मन सबके खिलखिला उठै
 भाईचारा मेलजोल बढाबे तै
 *****************
असहाय के सहारा बन जा
आशीष भगवान के पाबे तै
मानवता हे सार जगत में
मानवता ही लेके जाबे तै।
 ****************
 #आचार्य_तोषण
धनगांव डौंडीलोहारा
बालोद, छत्तीसगढ़
*****************