बजरंगबली अंजनी के लाल हे

महिमा ह तोर अगम अपारा।
हावय मोला तोर सहारा।
===================
बजरंगबली अंजनी के लाल हे
दुनिया म आके करे कमाल हे

रूप धरे बानर के केसरी नंदन
जग ह करत हावय तोरेच बंदन
राम के भजइय्या तोर तेज भाल हे
दुनिया म आके करे कमाल हे
ननपन ले तैह राम गुन गाए
सीयाराम ल हिरदे म बसाए
महिमा ल गाए तोर महाकाल हे
दुनिया म आके करे कमाल हे
मुंह म दबाए तै सूरज के गोला
इंदरह मारिस हे बजर म तोला
करनी म इंदर झुकाए भाल हे
दुनिया म आके करे कमाल हे
राम ल मिले बर तै संत बनके आए
सुगरी स जाके तै मितवा बनाए
आरती सजाए तै सुघर थाल हे
दुनिया म आके करे कमाल हे
सीता माता के शोर ल ते पाए
खाए फरफूल ल अऊ लंका जराए
राकछस मन बर तै बनगे काल हे
दुनिया म आके करे कमाल हे
लगे शक्ति लछमन ल सजीवन लाए
कालनेमी राकछस ल मुक्ति देवाए
छेंके तोल झरिया बने घडियाल हे
दुनिया म आके करे कमाल हे
तोरे मंतर ल बिभीषन मानिस
राम के महिमा ल तोर मुंहू ले जानिस
बाजू तोर चुटकी संग करताल हे
दुनिया म आके करे कमाल हे
राम के उमर बर तै सेंदुर ल चुपरे
जय राम जयराम मने मन म सुमरे
रूप दिखत हे तोर लाले लाल हे
दुनिया म आके करे कमाल हे
तोर महिमा के मय करंव का बखान
हावस बजरंगी सकल गुन के खान
पाए तोर भक्ति जोहर के लाल हे
दुनिया म आके करे कमाल हे
====================
बजरंग बली की जय
====================
-आचार्य तोषण