॥बादर॥

~~~~~~~~~~~~~~~~
धान कोठरी ले हेराय परे हे
खेत खलिहान चतराय डरे हे
कोन जनी कहा लुकागे रे बादर
संसो म बबा ह तरवा ल धरे हे
~~~~~~~~~~~~~~~~~~
जजबात तो बने हे तोर बात मा
का जादू हे ओखर करामात मा
देख हवा गरेल मन ला लागय
झूम बरसही आज बादर रात मा

~~~~~~~~~~~~~~~~~~~
फलक ले फलकत आवय पानी
धन्य होगे मोर तोर जिनगानी
मन लगाके अब धान बोंलय
आगे दिन अब खेती किसानी
~~~~~~~~~~~~~~~~~~
आजा झुमर के तै आसाढ़ म
भुंइया सुखावय ठाढ़े ठाढ़ म
अइसे जमदरहा बरसबे तै
झन बोहावय कोनो बाड़ म
~~~~~~~~~~~~~~~~~
एसो के सावन बने बरसाबे
झन कोनों ल तै तरसाबे
हंसी खुसी मया बांटत रहिबे
झन कोनों ल तैहा रोवाबे
~~~~~~~~~~~~~~~~~~
॥आचार्य.तोषण॥