हे भारत के माटी तोला,

तोर महिमा अजर अमर रही दाई
हम भले दिन चार रहन न रहन...
~~~~~~~~~~~~~~~~~
हे भारत के माटी तोला,
घेरी बेरी परनाम हे
जनम देहस बलिदानी लइका,
तोर चरन मा चारो धाम हे

उत्तर हवय हिमालय परबत
छाती ताने खड़े हे सरपट
सेंकय बइरी मनला झटपट
दकछिन मा रतनाकर सिंधु
गोड़ धोवय सुखधाम हे
हे भारत के माटी तोला,
घेरी बेरी परनाम हे
जनम देहस बलिदानी लइका,
तोर चरन मा चारो धाम हे
बोहिथे जिंहा गंग के धारा
ग्यान के कोठी हवय अपारा
गुनला गावय जुरमिल सारा
शंख बजावय मंगल गावय
आरती करय सुबो साम हे
हे भारत के माटी तोला,
घेरी बेरी परनाम हे
जनम देहस बलिदानी लइका,
तोर चरन मा चारो धाम हे
तोर कोरा म खेलेन कूदेन
बन डोंहडू बगिया म फूलेन
अचरा म तोरे झुलना झुलेन
तन मन धन ला अरपन करिके
करन सेवा आठो याम हे
हे भारत के माटी तोला,
घेरी बेरी परनाम हे
जनम देहस बलिदानी लइका,
तोर चरन मा चारो धाम हे
बालकिसन ह बंसी बजावय
समर भूमि म गीता सुनावय
दया धरम के पाठ पढावय
रख मरियादा तै जिनगी म
रस्दा बतावय राम हे
हे भारत के माटी तोला,
घेरी बेरी परनाम हे
जनम देहस बलिदानी लइका,
तोर चरन मा चारो धाम हे
अइन अंगरेजन बनके आंधी
लड़िन अजाद भगत अउ गांधी
सूंत एक्य के सबझन बांधी
अजादी के लहरे तिरंगा
भारत माता के नाम ले
हे भारत के माटी तोला,
घेरी बेरी परनाम हे
जनम देहस बलिदानी लइका,
तोर चरन मा चारो धाम हे
॥जननी:जन्मभुमिश्च स्वर्गादपि गरीयसी॥
॥आचार्य तोषण॥
॥धनगांव डौंडीलोहारा॥
॥बालोद.छत्तीसगढ़.भारत॥