कोन डगर मा...

कोन डगर मा...
तोर अगोरा म बइठे बइठे
बेरा घलो पहागे।
किरिया खवाके तै मोर मैना
कोन डगर मा भुलागे।
मोंगरा के गजरा पांव के पैरी
लाए रहेंव तोर बर।
हांथ के चूरी कनिहा के करधन
बिसाए रहेंव तोर बर।
मया के गुड़ खाए के पहिली
काबर मुहु करुवागे।
किरिया खवाके तै मोर मैना
कोन डगर मा भुलागे। तोर अगोरा म...

सपना रिहिस तोर संन
मया के कुरिया बसातेंव
अमरइय्या पीपर लीम छांव मा
मया के गीत ल गातेंव।
मया भरे मोर हिरदय मा
दगा के छुरी चलागे।
किरिया खवाके तै मोर मैना
कोन डगर मा भुलागे। तोर अगोरा म...
-आचार्यतोषण