असाढ़//रिमझिम

-:शीर्षक:-
असाढ़//रिमझिम
××××××××××××××××
महीना असाढ़ सावन के
चले पुरवइया सर-सर
रिमझिम बरसै बरसा रानी
ये भुंइया म झर-झर
××××××××××××××××
बिजूरिया तड़के तड़-तड़
गरजे बदरा घड़-घड़
जोगनी बरय झींगुरा झींगे
मेंचका नरियावै टर-टर
रिमझिम बरसै बरसा रानी
ये भुंइया म झर-झर----१
××××××××××××××××
आए असाढ़ झुमै किसान
चले चलिन बोंएबर धान
छावै बदरा बदले मउसम
सावन मनाए भोला हर-हर
रिमझिम बरसै बरसा रानी
ये भुंइया म झर-झर----२
××××××××××××××××
खेती खार घलो हरियागे
मन मा मोर खुसी हमागे
पहिली तिहार हरेली मनावै
चीला चढ़ाए थारी भर-भर
रिमझिम बरसै बरसा रानी
ये भुंइया म झर-झर----३
××××××××××××××××
आचार्य तोषण, धनगांव
डौंडीलोहारा बालोद
××××××××××××××××