-खरखरा नहर

शीर्षक:-खरखरा नहर
धनगांव के बीच गली ले
खरखरा ह बोहावत हे
लइका जवान सियान मितान
जिंहा लगर लगर के नहावत हे।
हरिहर करै धनगांव के धनहा
बंजर मटासी ल पुरोवत हे
सरदी गरमी बरसात के दिन मा
सबो के जीव ला जुड़ोवत हे
गंगा बरोबर इंहा के पानी
धारे के धार बोहावत हे।
लइका जवान सियान मितान
जिंहा लगर लगर के नहावत हे।
घूमघाम के इहा के पानी
भिलाई शहर मा जावत हे
दल्लीराजहरा के खनिज सम्पदा सन
सुघर लोहा बनावत हे
शान जिला बालोद के
जन जन हा गोहरावत हे
लइका जवान सियान मितान
जिंहा लगर लगर के नहावत हे।
बसे हवै खरखरा के तीर मा
सुघर मोर गांव धनगांव
कभू कभार भूलत भटकत
हमरो डहर सुघर पांव उठाव
नेवता हे सबला गाड़ा भरके
ये आचार्य तोषण हा बलावत हे
लइका जवान सियान मितान
जिंहा लगर लगर के नहावत हे।।

आचार्य तोषण
सरस्वती शिशु मंदिर
डौंडीलोहारा